Hello !
上回講到食完晚餐 , 之後四圍行兼影相 ,
影夠就返酒店睇電視 , 攪埋D手尾就休息 .
呢篇叫做酒店失策篇 , 至於點解咁失策 ?
依家就詳細講解事件既始末 .
話說尋晚食完晚餐影晒相 , 返酒店睇電視 , (當時做緊西片 "幽靈車神" )
突然間房裡傳來微量既二手煙味 , 當時心諗 : 邊鬼個咁夠薑在走廊度吸煙 ?
於是第一時間飛身開門睇個究竟 , 點知乜鬼都冇 , 經過詳細檢查後 ,
發現係由中央冷氣糟果度傳過來 , 有冇攪錯呀 , 又話乜野 15/F
全新裝修禁煙 "Stylish Room" ? 就算其他房既住客偷雞吸煙 ,
都冇理由傳到去其他房間架 ? 雖知唔吸煙既人 , 即使聞到些小既二手煙 ,
輕則怒從心中起 , 重則可以失控斬人 , 後果可以好嚴重 . haha ...
所以在我既立場 , 呢間酒店可以話係 "永不錄用" .
講開又講 , 今次機票套餐裡面 , 其實都有好多間酒店選擇 ,
見到呢間酒店好似唔錯喎 , 點知一試就出事 , 真係激氣 .
而3日2夜酒店連轉機機票乙張套餐 , 選擇如下 :
Keio Plaza Hotel Sapporo 15/F Sytlish Floor (單人房) $5800
Hotel Gracery Sapporo (單人房) $5560
JR Tower Hotel Nikko Sapporo (單人房) $6260
仲有好多間 , 價錢都係5仟幾左右 ,
早知揀番上次果間 JR Tower Hotel Nikko Sapporo 啦 ,
夜晚仲可以浸SPA添 , 今次失誤令到行程蒙上污點 , 真失策 !
不過唔住都住左 , 都要介紹間房既 , 打開房門行入去 ,
直去就睡床 , 右手邊係洗手間 .
單人房 , 得一張床 .
LCD TV , 下面雪櫃 , 右手邊寫字檯 .
對面係沙發 & 空氣清新機 .
床頭果個窗可以透到洗手間既燈光 , 夠晒環保 .
輪到參觀洗手間 , 馬桶一個 .
就係呢個窗 , 可以透番廳裡既燈光過黎 .
成間房既全圖 , 屬於長方型 .
果陣剛起身 , 影埋窗外咯 , 一轉身就係呢個景 .
15樓都好似好高咁既 ?
對正條鐵路 .
直望落去就係6/F停車場 , 淨係可以泊自己友既車咋 .
有部 "旭川動物號" 列車駛過 , 咁就順便介紹埋佢啦 .
呢部列車 , 係去 "旭山動物園" 既專屬列車 ,
出面印晒D動物圖案 , 好得意架 , 不過當然唔止咁簡單啦 ,
聽講車廂裡面都好攪野 , 總之就內有乾坤啦 .
只得四卡車 , 短癮D喎 .
"北極熊" 打頭陣 , 型呀 .
"企鵝" 守尾門 , Cute爆呀 . haha ...
Bye Bye !
P.S. : 講番酒店果Part , 頭先好似踩得盡過頭 ,
講番句公道說話 , 撇除上述果單 "二手煙" 不愉快事件既話 ,
呢間都係一間唔錯既酒店 , 只係離JR站稍遠 .
沒有留言:
發佈留言
歡迎光臨 , 如果時間許可 , 請留番個言丫 ~